វិបត្តិអាកាសធាតុ បានបង្កជារលកកម្ដៅដ៏ធ្ងន់ធ្ងរ ដែលមានគ្រោះថ្នាក់ដល់ប្រទេស និងតំបន់ជាច្រើន។ ប្រទេស និងតំបន់ខ្លះបានបំបែកកំណត់ត្រារបស់ខ្លួន លើការទទួលរងកម្ដៅខ្ពស់បំផុត ក្នុងរយៈពេលប៉ុន្មានឆ្នាំ ឬប៉ុន្មានទសវត្សចុងក្រោយ។ តើលោកអ្នកចង់ដឹងទេថា ប្រទេស និងតំបន់ណាខ្លះ នឹងប្រឈមហានិភ័យ​​រលកកម្ដៅនេះ ធ្ងន់ធ្ងរជាងគេ?

យោងតាមគេហទំព័រសារព័ត៌មាន CNN អ្នកវិទ្យាសាស្ត្រ បានសម្គាល់តំបន់មួយចំនួនជា “តំបន់ក្ដៅ” ឬ “Hot Spots” ដែលជាតំបន់ប្រឈមនឹងហានិភ័យរលកកម្ដៅ​ខ្ពស់បំផុត។ ក្នុងនោះ មាន​ប្រទេសអាហ្វហ្គានីស្ថាន ប្រទេសប៉ាពួញូហ្គីណេ និងតំបន់អាមេរិកកណ្ដាល រួមមាន ប្រទេសហ្គាតេម៉ាឡា ប្រទេសហុងឌូរ៉ា និងប្រទេសនីការ៉ាហ្គា។

មានតំបន់ជាច្រើន ដែលបានទទួលរងផលប៉ះពាល់​នៃវិបត្តិរលកកម្ដៅ ដោយមិនបានត្រៀមទុកមុន។ ចំណែកឯតំបន់ខាងលើនេះ ជាតំបន់ដែលងាយប្រឈមនឹងហានិភ័យធ្ងន់ធ្ងរ ក្នុងករណីកើតមានវិបត្តិរលកកម្ដៅ។

តំបន់ទាំងនេះ មានចំណុចខ្សោយជាច្រើនរួចជាស្រេច​ទៅហើយ ដែលជាការលំបាកមួយ ក្នុងការទប់ទល់នឹងវិបត្តិអាកាសធាតុនេះ។ បញ្ហាទាំងនោះ រួមមាន បញ្ហាសង្គម បញ្ហាសេដ្ឋកិច្ច បញ្ហាកំណើនចំនួនប្រជាជន និងបញ្ហាខ្វះសេវាសុខាភិបាល និងខ្វះថាមពលផ្គត់ផ្គង់៕

ប្រភព៖ CNN https://edition.cnn.com/

រក្សាសិទ្ធិ©ដោយ៖ ពេទ្យយើង