ជំងឺបេះដូង អាចបង្កគ្រោះថ្នាក់ដល់ស្ត្រី ក្នុងពេលសម្រាលទារក ហើយជំងឺបេះដូង គឺជាមូលហេតុលេខ១ នៃការស្លា.ប់របស់ស្ត្រី ក្នុងនាមជាម្ដាយ អំឡុងពេលសម្រាលទារក និងក្នុងរយៈពេលមួយឆ្នាំ ក្រោយសម្រាល។ របាយការណ៍ឆ្នាំ២០១៨ របស់អ្នកវិទ្យាសាស្ត្រ បានបង្ហាញថា ជិត ៧០% នៃការស្លា.ប់ទាំងនេះ ជាហានិភ័យ ដែលគេអាចបង្ការបាន ប្រសិនបើមានការយកចិត្តទុកដាក់។

អំឡុងពេលស្ត្រីមានផ្ទៃពោះ បេះដូងរបស់ស្ត្រី ធ្វើការទ្វេដង ក្នុងពេលតែមួយ នោះគឺវាមាននាទីបូមឈាមច្រើនជាងធម្មតា ដើម្បីទៅចិញ្ចឹមរាងកាយដល់ទៅពីរ ក្នុងពេលតែមួយ គឺរាងកាយម្ដាយផង និងរាងកាយកូនផង។ ក្នុងអំឡុងពេលនេះ ការផ្គត់ផ្គង់ឈាម កើនឡើងដល់ទៅ ៣០-៥០%។

វេជ្ជបណ្ឌិត Aiyanna Anderson គ្រូពេទ្យផ្នែកសម្ភព ក្នុងក្រុង Fort Worth នៃរដ្ឋ Texas លើកឡើងថា ការពពោះរយៈពេល ៩ខែ គឺដូចជាដាក់សម្ពាធដល់បេះដូងស្ត្រី ដល់ទៅរយៈពេល ៩ខែ។ ប៉ុន្តែប្រសិនបើស្ត្រីមានជំងឺបេះដូងទៀតនោះ សម្ពាធមានកាន់តែកើនឡើងខ្លាំង ចំពោះបេះដូងស្ត្រីនោះផ្ទាល់។

ផ្អែកទៅតាមគ្លីនិកល្បីល្បាញមួយ ក្នុងសហរដ្ឋអាមេរិក Cleveland Clinic ប្រភេទជំងឺបេះដូង ដែលកើតឡើង ញឹក​ញាប់ជាងគេ និងមានគ្រោះថ្នាក់ខ្ពស់បំផុត លើស្ត្រីមានផ្ទៃពោះ គឺជំងឺសាច់ដុំបេះដូង (Cardiomyopathy)។

គួរបញ្ជាក់ថា ផលវិបាកនៃជំងឺបេះដូងនេះ បង្កគ្រោះថ្នាក់ច្រើនប្រភេទ ផ្ទួនគ្នាលើស្ត្រី។ ពោលគឺអំឡុងពេលស្ត្រីពពោះ ជំងឺបេះដូងអាចបង្កជំងឺលើសឈាម ជំងឺញ័រប្រកាច់ ចង្វាក់បេះដូងមិនស្ថិរ ការកកឈាម និងកាន់តែធ្ងន់ធ្ងរនោះ គឺមានជំងឺដាច់សរសៃឈាម និងគាំងបេះដូង។

វិធីបង្ការហានិភ័យជំងឺបេះដូង សម្រាប់ស្ត្រីពពោះ៖

១. ចាក់វ៉ាកសាំងជំងឺកញ្ជ្រិល និងជំងឺគ្រុនផ្ដាសាយ

២. ជៀសវាងជាតិអាល់កុល ឬថ្នាំវេជ្ជសាស្ត្រ (តាមវេជ្ជបញ្ជា)

៣. ទទួលទានអាស៊ីតហ្វូលិកបំប៉ន ០.៤មីលីក្រាម/ថ្ងៃ ក្នុងត្រីមាសទីមួយ (១២សប្ដាហ៍ដំបូង)

៤. ប្រឹក្សាជាមួយវេជ្ជបណ្ឌិត ឬទទួលវេជ្ជបញ្ជា មុនទទួលទានថ្នាំផ្សេងៗ

៥. កុំប៉ះពាល់មនុស្ស ដែលមានជំងឺឆ្លង

៦. ប្រសិនបើមានជំងឺទឹកនោមផ្អែម សូមគ្រប់គ្រងជំងឺឱ្យបានល្អ

ប្រភព៖ FWR https://fortworthreport.org/ & NHS https://www.nhs.uk/

រក្សាសិទ្ធិ©ដោយ៖ ពេទ្យយើង