ការហែលទឹកអាង ឬត្រាំខ្លួន នៅក្នុងអាង​ទឹក គឺជាសកម្មភាពកម្សាន្ត ក៏ដូចជា សកម្មភាពបន្ធូរអារម្មណ៍មួយ​ដ៏ពេញនិយមសម្រាប់​កុមារ និងមនុស្សគ្រប់វ័យ។ ហើយជាធម្មតា ក្នុងពេលត្រាំទឹកអាង មនុស្សភាគច្រើន តែងមានទម្លាប់នោមក្នុងទឹកអាងដែលកំពុងត្រាំខ្លួន និងមានមនុស្សដទៃទៀត ក៏បាននោម​​ក្នុងពេលតែមួយ។

យោងតាមការសិក្សា ការនោមក្នុងអាងទឹក ជាទម្លាប់ធម្មតាមួយ ដែលមនុស្សគ្រប់គ្នា មើលរំលង ហើយមិនដឹងថា មានផលប៉ះពាល់ដល់សុខភាពបែបណានោះទេ។ ស្ដាប់ទៅធម្មតាៗ ប៉ុន្តែតាមពិត ទម្លាប់នេះ មានគ្រោះថ្នាក់ខ្លាំង​ទៅលើបេះដូង និងសួត ប្រសិនបើអ្នកស្ថិតក្នុងអាងទឹកនោះ​ផ្ទាល់។ នេះបើយោងតាមគេហទំព័រ Time។

ជាទូទៅ នៅក្នុងទឹកអាង មានផ្ទុកសារជាតិក្លូរីន សម្រាប់សម្អាតមេរោគឱ្យបានស្អាត សម្រាប់អ្នកហែលលេងកម្សាន្ត។ ប៉ុន្តែការសិក្សាមួយ បានបង្ហាញថា ក្លូរីន មិនអាចសម្លាប់សារជាតិ ដែលចេញពីទឹកនោមបាននោះទេ ហើយបន្ថែមពីលើនេះទៀត វាអាចបង្កប្រតិកម្មគីមី និងបង្កើតជាសារជាតិពុលនៅក្នុងទឹក។

៩៥% នៃទឹកនោមរបស់មនុស្ស គឺជាទឹក។ ៥% ទៀត គឺជាកាកសំណល់ចំណីអាហារ និងកាកសំណល់ភេសជ្ជៈ ដែលត្រូវបានរំលាយ។ ក្នុងទឹកនោម មានសារធាតុ៖

១. និជ្ជីវជាតិ៖ ជាសារធាតុមួយ ផលិតដោយថ្លើម មាននាទីជាអ្នកបញ្ចេញចោលនូវអាម៉ូញាក់ និងអាស៊ូតលើស

២. អាស៊ីតអ៊ុយរិច៖ ជាកាកសំណល់អាហារ និងភេស្ជជៈ ដែលមានជាតិអាស៊ីត ឬជាតិអាល់កុល

៣. អេឡិចត្រូលីត៖ ក្នុងនោះ មាន​សូដ្យូម ក្លរ ប៉ូតាស្យូម និងផូស្វ័រ

៤. កម្ទេចកម្ទីរល្អិតៗ៖ ក្នុងនោះ មាន​កោសិកាឈាមងាប់ៗ កាកសំណល់បារី គ្រឿងញៀន ពពួកវីតាមីន និងសារធាតុផ្សេងៗចម្រាញ់ចេញពីតម្រងនោម

នៅពេលដែលមនុស្សនោម ទឹកនោមនាំមកជាមួយគ្នានូវសារធាតុផ្សេងៗ ដែលបានរៀបរាប់ខាងលើ។ ការសិក្សានេះដដែលក៏បានលើកឡើងថា អាស៊ីតអ៊ុយរិច ប្រតិកម្មជាមួយនឹងក្លូរីន បង្កើតចេញជាសារធាតុ cyanogen chloride (CNCI) និង trichloramine (NCl3)។ CNCI គឺជាសារធាតុគីមីពុលមួយ ដែលបង្កផលប៉ះពាល់លើសរីរាង្គ ដូចជា សួត បេះដូង និងប្រព័ន្ធប្រសាទ។ របាយការណ៍កន្លងមក ក៏បានបង្ហាញ​ពីទំនាក់ទំនងរវាង NCl3 និងការកើតមានរបួសសួត​ស្រួចស្រា​វផងដែរ៕

ប្រភព៖ Time https://time.com/ & Cleveland Clinic https://my.clevelandclinic.org/

រក្សាសិទ្ធិ©ដោយ៖ ពេទ្យយើង