ជំងឺផ្ដាសាយបក្សី ដែលកំពុងរាលដាល មួយរយៈចុងក្រោយនេះ បានរាលដាលទៅកាន់សត្វកកេរ និងសត្វកញ្ជ្រោង ដែលជាការឆ្លងរាលដាលធំជាងគេបង្អស់។ នេះបើយោងតាម​គេហទំព័រ BBC។ ទិន្នន័យ បានបង្ហាញថា បក្សីចំនួនប្រមាណ ២០៨លានក្បាល ជុំវិញសកលលោក បានងាប់ ដោយការរាលដាលនេះ ហើយគេឃើញមានយ៉ាងតិច ២០០ករណី កើតមានលើថនិកសត្វ រួមមាន សត្វកកេរ និងសត្វកញ្ជ្រោង ជាដើម។

ក្រោយជំងឺផ្ដាសាយបក្សី បានរាលដាលទៅថនិកសត្វ អ្នកជំនាញសុខាភិបាលសាធារណៈមួយចំនួន បានបង្ហាញការបារម្ភពីការឆ្លងបន្តទៅកាន់មនុស្ស។ ទោះជាបែបនេះក៏ដោយ ហានិភ័យនៃការឆ្លងនេះ គឺទាប​ទេ។ គេនឹងតាមដាន ក៏ដូចជា ធ្វើតេស្តខ្ជាប់ខ្ជួនទៅលើសត្វ និងមនុស្សក្នុងចក្រភពអង់គ្លេស ដែលមានពាក់ព័ន្ធនឹងប្រភពវីរុស។

អ្នកជំនាញផ្នែកសុខាភិបាល បានបង្ហាញថា ថនិកសត្វ ដែលឆ្លងវីរុសនេះ គឺបានស៊ីសត្វបក្សី ដែលឈឺ ឬងាប់ ដោយសារជំងឺផ្ដាសាយបក្សី។ គេក៏យល់ថា ពពួកសត្វ ដែលបានឆ្លង មានសមត្ថភាពបំប្លែងមេរោគ ដែលធ្វើឱ្យវាងាយនឹងឆ្លងវីរុសផ្ដាសាយបក្សីនេះ។ ប៉ុន្តែគេមិនបានរកឃើញថា ពពួកថនិកសត្វទាំងនេះ អាចចម្លងទៅថនិកសត្វដូចគ្នាបាននោះទេ។

យ៉ាងណាក៏ដោយ ក្រុមអ្នកជំនាញ និងអាជ្ញាធរសុខាភិបាល​ប្រចាំអង់គ្លេស នឹងបង្កើនការតាមដាន និងទប់ស្កាត់ហានិភ័យណាមួយ នៃជំងឺគ្រុនផ្ដាសាយបក្សី៕

ប្រភព៖ BBC News II https://www.bbc.com/

រក្សាសិទ្ធិ©ដោយ៖ ពេទ្យយើង