សេចក្តីរាយការណ៍ បានបង្ហាញថា ខណៈពេលដែលកូវីដ១៩ វាយប្រហារពលរដ្ឋចិនខ្លាំង អ្នកជំងឺកូវីដ កំពុងខ្វះខាតមន្ទីរពេទ្យ គ្រែសម្រាកព្យាបាល ដែលបង្កទិដ្ឋភាពភ័យខ្លាចដល់ពលរដ្ឋចិន។ ម្នាក់ៗ រួសរាន់ស្វែងរកថ្នាំព្យាបាល តាមប្រព័ន្ធអនឡាញ ដែលជាហេតុនាំឱ្យ​ទីផ្សារងងឹត នៅចិន បើកទ្វារឱ្យមានចរាចរណ៍ថ្នាំឥណ្ឌាក្លែងក្លាយ។

ស្របតាមស្ថានភាព ដែលការផ្គត់ផ្គង់ថ្នាំ Pfizer’s Paxlovid មានកំណត់ និងមានតម្លៃ ថ្លៃកប់ពពក រួមទាំងគ្លីនិករដ្ឋចិន មានគោលការណ៍តឹងរឹងផងដែរ នាំឱ្យ​ប្រជាជនចិន សម្រុកទិញថ្នាំកូវីដ១៩ Paxlovid និងថ្នាំឥណ្ឌា តាមប្រព័ន្ធអ៊ិនធើណែត កាលពី​សម័យកាលកូវីដសូន្យ រៀបនឹងចប់នៅថ្ងៃទី០៧ ខែធ្នូ ឆ្នាំ២០២២។

តាំងពីពេលនោះមក ចិនទទួលរងនូវសម្ទុះ​ករណីឆ្្លង​កូវីដ១៩ រាប់លានករណី បើយោងតាមគណៈកម្មការសុខភាពជាតិ ក្នុងប្រទេសចិន។ គេគណនាថា ករណីកូវីដ១៩ បានកើនដល់ ២៥០លានករណី គិតត្រឹមថ្ងៃទី២០ ខែធ្នូ ឆ្នាំ២០២២។ ទោះបីករណីភាគច្រើន មានកម្រិតស្រាល តែ​ក្នុងទីក្រុងមួយចំនួន មានមនុស្សចាស់ជាច្រើន ទទួលមរណភាព ជាពិសេសមនុស្សចាស់ ដែលមិនបានចាក់វ៉ាក់សាំង។ មន្ទីរពេទ្យ និងកន្លែងដាក់សាកសព បានកកស្ទះ​ និងត្រូវរង់ចាំរយៈពេលយូរ។

ទិដ្ឋភាពទាំងនេះ បានបង្កភាពភ័យខ្លាច ទៅលើពលរដ្ឋចិន ដែលនាំគ្នារួសរាន់ស្វែងរកថ្នាំព្យាបាល លើប្រព័ន្ធអនឡាញ។ ករណីនេះ បានបើកទ្វារ​ដល់ចរាចរណ៍ថ្នាំក្លែងក្លាយ ក្នុងទីផ្សារងងឹត។ ថ្នាំ Pfizer’s Paxlovid មានតម្លៃខ្ពស់ខ្លាំង ក្នុងទីផ្សារងងឹត​។ បើយោងតាម ABC News អ្នកជំងឺខ្លះចំណាយដល់ទៅ ១៨ ០០០យាន់ ស្មើនឹង ៣ ៨៤៣ដុល្លារអាមេរិក ក្នុងមួយប្រអប់ (តម្លៃកើនដល់ ៩ដង នៃតម្លៃដើម)។ ហេតុនេះ ទើប​ពលរដ្ឋចិន ស្វែងរកជម្រើសធូរថ្លៃជាង ដែលឈានដល់វត្តមានការចែកចាយថ្នាំឥណ្ឌា តែជាថ្នាំក្លែងក្លាយ​។ រដ្ឋាភិបាលចិន ក៏បានចេញសារប្រកាស ឱ្យពលរដ្ឋ ជៀសវាងទិញ​ថ្នាំឥណ្ឌាក្លែងក្លាយទាំងនេះ រួចមកហើយ៕

ប្រភព៖ The Hindu II https://www.thehindu.com/ & ABC News II https://www.abc.net.au/news/

រក្សាសិទ្ធិ©ដោយ៖ ពេទ្យយើង