មិនថា មនុស្សពេញវ័យ ឬកុមារ អ្នកតែងមានទម្លាប់អង្គុយមិនត្រង់ខ្លួន ឬមិនរឹងមាំ ព្រោះតែអារម្មណ៍របស់យើង ផ្ដោតទៅលើរឿង ដែលអ្នកកំពុងធ្វើទាំងស្រុង។ ការមិនបានយកចិត្តទុកដាក់ពីឥរិយាបថអង្គុយ អាចមានផលប៉ះពាល់ច្រើន ដែលមនុស្សជាច្រើន មិនបានដឹង។ ចំណុច ដែលងាយកត់សម្គាល់ជាងគេ គឺ​រាងកាយរបស់អ្នកកោង ខុសពីរាងកាយពីកំណើត។ លើសពីនេះទៀត វាអាចបង្កភាពតានតឹងសាច់ដុំ ឈឺសន្លាក់ អន់ថយលំហូរឈាម បញ្ហាដង្ហើម និងខ្សោយកម្លាំង ជាដើម។ ទាំងនេះ ជាគន្លឹះមួយចំនួន ដែលអាចជួយកូនៗ កែទម្លាប់អង្គុយមិនល្អ។

ជារឿងចាំបាច់ អ្នកគួរបង្រៀនកូនឱ្យមានទម្លាប់អង្គុយល្អ ចាប់ពីកុមារភាពមក។ គន្លឹះទាំងនេះ អាចជួយអ្នក ក្នុងនាមជាអាណាព្យាបាលបាន៖

១. អ្នកត្រូវពិនិត្យស្វែងយល់អំពីឥរិយាបថដងខ្លួន​ទាំងមូលរបស់កូន។ មើលថា កូនមានឥរិយាបថល្អ ឬនៅ? រួចលោកអ្នកគួរប្រាប់ពីវិធីរក្សាឥរិយាបថ ដែលត្រឹមត្រូវដល់កូនៗឱ្យបានដឹង។

២. ប្រាប់ពីឥរិយាបថត្រូវ ទៅកូន តាមរយៈការពន្យល់ទៅកូន នូវផលវិបាកនៃការឥរិយាបថអង្គុយមិនល្អ។ ការប្រើពាក្យថា “អង្គុយឱ្យត្រង់” និង “កុំផ្ដេកខ្លួន” មិនមែនជាវិធីបង្រៀនកូន ដែលមានប្រសិទ្ធភាពនោះទេ។ ផ្ទុយទៅវិញ អ្នកគួរប្រាប់ពីគុណវិបត្តិ និងព្យាយាមរំលឹកកូនរបស់អ្នក នៅពេលពួកគេធ្វើខុស។

៣. ដាក់ខ្នើយតូចល្មម នៅពីក្រោយខ្នងរបស់កូន។ ប្រសិនបើកូនអង្គុយរៀន ឬប្រើកុំព្យូទ័ររយៈពេលច្រើនម៉ោង អ្នកគួរបើកភ្លើង​ឱ្យបានភ្លឺល្អ។ បន្ថែមពីលើនេះទៀត អ្នកគួរដាក់ខ្នើយនៅពីក្រោយខ្នងកូនៗ ដើម្បីឱ្យកូនផ្អែក និងមិនវៀចខ្លួន។

៤. លើកទឹកចិត្តឱ្យកូន ធ្វើលំហាត់ប្រាណ ឬធ្វើចលនា ឱ្យបានច្រើន។ នោះវាអាចជួយកុមារ បង្កើនឥរិយាបថ កម្លាំង ភាពបត់បែន និងលំនឹង​ដងខ្លួន។ បន្ថែមពីលើនេះទៀត កុមារអាចកាត់បន្ថយការឈឺសាច់ដុំ ការខ្សោយកម្លាំង ស្ត្រេស និងហានិភ័យទទួលរងរបួសពីកត្តាណាមួយ។ ទិញសម្ភារៈហាត់ប្រាណដាក់ផ្ទះ ដើម្បីឱ្យកូនមានចិត្តចង់ហាត់ប្រាណ។

៥. ក្នុងនាម​ជាអាណាព្យាបាល អ្នកគួររក្សាទម្លាប់ល្អ ជាគំរូ ឬឧទាហរណ៍​ សម្រាប់កូនអនុវត្ត​តាម។ នោះ​មានន័យថា អ្នកគួររក្សាឥរិយាបថល្អ ឬហាត់ប្រាណជាប្រចាំ។

៦. ជ្រើសរើសកាតាបដាក់សៀវភៅ ដែលមិនដាក់សម្ពាធដល់កូន។ ប្រាប់ឱ្យកូនយកតែសៀវភៅ ដែលចាំបាច់ ទៅសាលាបានហើយ។ ទិញ​កាតាប ដែលទូលាយ សម្រាប់កូនស្ពាយទៅសាលា ដូចនេះ ស្មា ខ្នង និងសាច់ដុំរបស់កូន មិនទទួលសម្ពាធខ្លាំង៕

ប្រភព៖ Times of India II https://timesofindia.indiatimes.com/etimes

រក្សាសិទ្ធិ©ដោយ៖ ពេទ្យយើង