ខ្យល់ពុលក្នុងបរិយាកាស មានពាក់ព័ន្ធទៅនឹងផលប៉ះពាល់ធ្ងន់ធ្ងរដល់សុខភាព រហូតឈានដល់ស្លាប់បាត់បង់ជីវិត ស្ទើរតែម្នាក់ក្នុងចំណោម៥នាក់ ឬស្មើនឹង២០% នៃកុមារកម្ពុជាក្រោមអាយុ៥ឆ្នាំ។ នេះបើយោងតាមការលើកឡើង របស់មូលនិធិសហប្រជាជាតិដើម្បីកុមារ (UNICEF)។

ក្រសួងសុខាភិបាលកម្ពុជា និងអង្គការយូនីសេហ្វ បានចេញរបាយការណ៍វាយតម្លៃជាលើកដំបូង លើផលប៉ះពាល់នៃបរិស្ថាន មកលើសុខភាពកុមារកម្ពុជា។ ក្នុងរបាយការណ៍នោះ គេបានបង្ហាញនូវបញ្ហាប្រឈាមចម្បងៗ រួមមាន៖

១. ខ្យល់ពុលក្នុងបរិយាកាស

២. សារធាតុពុលក្នុងទឹក និងក្នុងចំណីអាហារ

៣. លោហៈធាតុដែលអាចបញ្ចេញសារធាតុពុល

៤. ថ្នាំសម្លាប់សត្វល្អិត

៥. កាកសំណល់ដែលអាចបង្កគ្រោះថ្នាក់

លោក Will Parks អ្នកតំណាងអង្គការ​យូនីសេហ្វប្រចាំកម្ពុជាបានបញ្ជាក់ថា  នាពេលបច្ចុប្បន្ន កុមារបាន និងកំពុងតែប្រឈមគ្រោះថ្នាក់យ៉ាងធ្ងន់ធ្ងរដល់សុខភាព និងប៉ះពាល់សិទ្ធិនានារបស់កុមារ ក្នុងនោះមានសិទ្ធិក្នុងការរស់រាមានជីវិត ដោយសារបញ្ហាបំពុលបរិស្ថាន។

បើយោងតាមការសិក្សា​ IQ Air ដែលជាស្ថាប័នសិក្សាពាក់ព័ន្ធទៅនឹងកម្រិតខ្យល់ពុលក្នុងបរិយាកាសពិភពលោក បានបង្ហាញថា ខ្យល់ពុលក្នុងទីក្រុងភ្នំពេញ នៅថ្ងៃទី២៧ ខែសីហា ឆ្នាំ២០២៣នេះ ស្ថិតក្នុងកម្រិតមធ្យម។ ការបំពុលបរិយាកាសក្នុងទីក្រុងភ្នំពេញ បណ្ដាលមកពីការដុតឥន្ធនៈ ដូចជា ប្រេងកាត ប្រេងម៉ាស៊ូត និងធ្យូងថ្មជាដើម។

ដើម្បីការពារសុខភាពពីផលប៉ះពាល់ គួរអនុវត្តវិធីសាស្ត្រដូចជា៖

១. ពាក់ម៉ាស់

២. ការបិទបង្អួច

៣. ប្រើម៉ាស៊ីនបន្សុទ្ធខ្យល់

៤. កាត់បន្ថយសកម្មភាពនៅខាងក្រៅ

ប្រភព៖ RFI https://www.rfi.fr/km/

រក្សាសិទ្ធិ©ដោយ៖ ពេទ្យយើង