Blog detail

Apr 29, 2022

អ្នកគេងមិនលក់ គួរតែស្វែងយល់ពីវិធីទាំងនេះ

 

មានមនុស្សមិនតិចទេ ដែលជួបប្រទះ​នឹងបញ្ហាគេងមិនលក់។ បញ្ហានេះ មកពីកត្តាជាច្រើន ហើយបើ​គេង​មិន​បាន​គ្រប់​គ្រាន់ នឹងបង្កជាបញ្ហាមួយចំនួន រួម​មាន ងងុយ​គេង​​នៅ​ពេល​ថ្ងៃ អស់​កម្លាំង ការ​ចងចាំ​ថយ​ចុះ អន្ទះអន្ទែង ងាយ​មាន​គ្រោះ​ថ្នាក់ និង​ខួរក្បាល​ដំណើរ​ការ​មិន​សូវ​ល្អ ​ជាដើម។

 

មូល​ហេតុ​ បណ្ដាល​ឲ្យ​គេង ​មិន​លក់​៖

​.ផ្លូវកាយ

ក្រពះ​មិន​រំលាយ​អាហារ ការ​ឈឺ​ចាប់​លើ​រាងកាយ ជំងឺ​បេះដូង ជំងឺ​ហឺត រលាក​ឆ្អឹង​ប្រហោង​មុខ​ ជាដើម។

.ផ្លូវចិត្ត

មាន​អារម្មណ៍​តានតឹង ព្រួយ​បារម្ភ​ច្រើន មាន​អារម្មណ៍​ជ្រួល​ច្របល់ ខឹង​សម្បារ មាន​អារម្មណ៍​សោកសៅ។

 

.របៀបរស់នៅ

ផឹក​កាហ្វេ ​ផឹកតែ​ច្រើន​ពេក ផឹកភេសជ្ជៈហ្គាស ដូចជា កូកាកូឡា ឬក៏ផឹក​ស្រា​នៅ​ពេល​យប់ ក៏អាច​រំខានដល់ដំណេកដែរ។ អ្នក​ញ៉ាំ​អាហារ​ច្រើន​ពេក ​មុន​ចូល​គេង ជក់​បារី​ច្រើន ធ្វើ​ការ​ខ្លាំង​មុន​ចូល​គេង មិន​សូវ​បាន​ហាត់​ប្រាណ គេង​ថ្ងៃ​ច្រើន និងគេង​មិន​ទៀង​ពេល ក៏បណ្តាលឱ្យគេងមិនលក់ដែរ នៅពេលយប់ៗ​។

 

.បរិស្ថានជុំវិញ

កន្លែង​គេង​ មាន​សំឡេង​រំខាន បរិយាកាស​អាប់​អួរ ហើយកន្លែង​គេង ​មាន​ពន្លឺ​ខ្លាំង​ពេក ក៏ជាមូលហេតុ ធ្វើឱ្យ​អ្នកគេង​មិនលក់ដែរ​។

 

ផលប៉ះពាល់ពីការគេងមិនលក់៖

អ្នកគេងមិនលក់ ប្រឈមនឹងជំងឺទាំងនេះ៖

.ជំងឺមហារីក
​​.ជំងឺបេះដូង
.ជំងឺទឹកនោមផ្អែម
.ជំងឺក្រពេញទីរ៉ូអ៊ីត
.ច្រាលអាស៊ីដក្រពះ
.ជំងឺទាក់ទង​​នឹង​ខួរក្បាល

.ស្រេ្តស

.បាក់​ទឹកចិត្ត​

 

ដំណោះស្រាយ​សម្រាប់​អ្នកគេងមិនលក់​៖

គ្រូពេទ្យឯកទេស បានណែនាំថា អ្នកមាន​បញ្ហា​គេង​មិន​លក់​ញឹកញាប់ និង​ក្នុង​រយៈ​ពេល​យូរ​ ត្រូវតែជួបគ្រូពេទ្យឯកទេស ដើម្បី​ពិគ្រោះ​​ឲ្យ​បាន​ដិត​ដល់ ស្វែង​រក​ដំណោះ​ស្រាយ​ត្រឹម​ត្រូវ ជាជាងការ​ប្រើប្រាស់​​ថ្នាំ​ងងុយ​គេង​។

​​.រៀបចំកំណត់ម៉ោងគេងទៀងទាត់​

ត្រូវគេង​ចន្លោះពី ៧ ទៅ ​៨ម៉ោង ក្នុង ១យប់​ ហើយ​ចូលគេង និង​ក្រោក​ពី​គេងទៀងម៉ោង ជា​រៀងរាល់យប់​។ ​បើគេងមិនលក់ ត្រូវបន្ធូរ​អារម្មណ៍​ ដោយ​អាន​សៀវភៅ ឬ​ស្តាប់​ចម្រៀង។  

 

.របបអាហារ

​មិន​គួរ​ចូល​គេង​ទាំង​ឃ្លាន ឬ​ឆ្អែត​ពេក​ទេ។ មុន​ចូល​គេង​ ២ម៉ោង យើង​គួរ​ចៀសវាង​​ញ៉ាំ​អាហារ​ច្រើន ឬ​​អាហារ ​ដែល​ពិបាក​រំលាយ ព្រោះ​ថា ​អាច​នឹង​មាន​អារម្មណ៍​​មិន​ស្រួល​ក្នុង​ខ្លួន ​ដែល​រំខាន​ដល់​ការ​គេង។ ចៀសវាង​ការទទួលទានភេសជ្ជៈ មាន​នីកូទីន កាហ្វេអ៊ីន និង​គ្រឿងស្រវឹង។ គ្រឿងស្រវឹង ​អាច​ធ្វើ​ឲ្យ​ងងុយ​គេង​ តែវា​ក៏​អាច​រំខាន​ដំណេក​ដែរ។

 

​.បរិយាកាសបន្ទប់គេង

បន្ទប់គេង ​​គួរ​រៀប​ចំ​ឲ្យ​ត្រជាក់ ងងឹត និង​ស្ងប់ស្ងាត់។  ​គួរ​ចៀស​វាង​ប្រើប្រាស់​គ្រឿងអេឡិចត្រូនិច ​ដូចជា​ មើលទូរស័ព្ទ ​មុន​ចូល​គេង។ ​យើងអាចបន្ធូរអារម្មណ៍ មុនចូលគេង ដោយងូតទឹក សមាធិ ឬ​ស្តាប់​ចម្រៀង។

 

.ការគេងថ្ងៃ

ចៀសវាង កុំ​គេងថ្ងៃយូរពេក។ ប្រសិនជា​​គេងពេល​ថ្ងៃ គួរ​កំណត់​​ត្រឹម​ ​៣០នាទី​។

 

.ការ​ហាត់​ប្រាណ

ការ​ហាត់ប្រាណ​រាល់ថ្ងៃ​ អាច​ជួយ​ដល់​ការ​គេង ​កាន់​តែ​ប្រសើរ​ឡើង ​ព្រោះ​ការ​ហាត់​ប្រាណ ​ជួយ​បន្ថយ​ភាព​តានតឹង និង​ធ្វើឲ្យ​យើង​​ហត់។ ប៉ុន្តែ​មិន​ត្រូវ​ហាត់​ប្រាណ​ នៅពេលជិត​​​ចូល​គេង​ទេ។ ​

 

. ការគិតច្រើន

​​ការ​គ្រប់​គ្រង​ភាពតានតឹង ​អាច​ជួយ​យើង​បាន ​ដោយ​ចាប់ផ្តើម​ពី​ការ​រៀបចំ កំណត់​អាទិភាព​ និង​បែងចែក​ការងារ​នីមួយៗ។ ការ​ធ្វើសមាធិ ​ក៏​អាច​ជួយ​បន្ថយ​​ការ​ថប់​បារម្ភ​ដែរ។ សម្រាប់​អ្នក​មាន​បញ្ហា​គេង​មិន​លក់​រាល់​ថ្ងៃ គួរ​ទៅ​ពិគ្រោះ​ ជាមួយ​គ្រូពេទ្យ ដើម្បី​ដឹង​ពី​មូលហេតុ និង​ការ​ព្យាបាល៕

 

រក្សាសិទ្ធិ©ដោយ៖ ពេទ្យយើង