Blog detail

Jan 27, 2022

សូមប្រុងប្រយ័ត្ន! ពេលនេះ មាន «អូមីក្រុងបំបាំងកាយ» រកឃើញ​នៅក្នុងប្រទេសជាង ៤០ហើយ

 

បច្ចុប្បន្ន អ្នកវិទ្យាសាស្រ្ត បានរកឃើញជំងឺកូវីដ-១៩ ប្រភេទបំប្លែថ្មីមួយទៀត ដែលបានបំប្លែង​ពី​អូមីក្រុង។ វីរុសកូវីដថ្មីនេះ ត្រូវបានគេដាក់ឈ្មោះថា «អូមីក្រុងបំបាំងកាយ» (stealth Omicron) BA.2 អ្នកវិទ្យាសាស្ត្រ បានរកឃើញវីរុសប្រភេទថ្មីនេះ នៅក្នុងប្រទេសជាង ៤០ហើយ នៅទូទាំងពិភពលោក​។

ទោះយ៉ាងណាក៏ដោយ អ្នកវិទ្យាសាស្ត្រ នៅ​មិនទាន់អះអាងបាននៅឡើយទេថា វាជាអ្វី អោយពិតប្រាកដ និងមានឥទ្ធិពល​យ៉ាងណា ចំពោះការរាតត្បាត នៅថ្ងៃខាងមុខ។ ពួកគេ​បានចាត់ទុកថា វីរុស បំប្លែងថ្មី BA.2 លាក់ខ្លួន នៅក្នុងទម្រង់ដើមរបស់វីរុសអូមីក្រុង ព្រោះហ្សែនរបស់វា មានលក្ខណៈពិបាកក្នុងការរកឃើញ។  

លោកស្រីAllison Arwady វេជ្ជបណ្ឌិតកំពូលរបស់ទីក្រុងឈីកាហ្គោ (Chicago) និងជាស្នងការសុខភាព បាននិយាយកាលពីថ្ងៃអង្គារថា ឥឡូវនេះ យើងកំពុងតាមដានប្រភេទបំប្លែងថ្មី​ពីទម្រង់ដើម​អូមីក្រុងនេះ។

លោកស្រី បន្ថែមថា «យើងមិនទាន់រកឃើញអ្វីនៅឡើយទេ នៅពេលនេះ និងកំពុងមានការព្រួយបារម្ភយ៉ាងខ្លាំង ចំពោះបញ្ហានេះ ប៉ុន្តែ​យើងកំពុងពិនិត្យមើលវា ហើយយើងនឹងប្រាប់រាល់គ្នាឱ្យដឹង ប្រសិនបើមានអ្វីដែលត្រូវចាប់អារម្មណ៍ ឬព្រួយបារម្ភ» 

លោកស្រី បន្តថា នេះជាអ្វីដែលយើងដឹងអំពី «អូមីក្រុង បំបាំងកាយ ឬ Stealth Omicron» រហូតមកដល់ពេលនេះ។

ចាប់តាំងពីពាក់កណ្តាលខែវិច្ឆិកា ឆ្នាំ២០២១ ប្រទេសចំនួនបី បានបញ្ចូលទិន្នន័យអ្នកឆ្លងកូវីដ-១៩ប្រភេទ BA.2 ជិត ១៥០០០ករណី ទៅក្នុងប្រព័ន្ធ GISAID ដែលជាប្រព័ន្ធសកលមួយ សម្រាប់ផ្តល់​ព័ត៌មាន និង​ចែករំលែកទិន្នន័យមេរោគឆ្លង។ គិតត្រឹមព្រឹកថ្ងៃអង្គារសប្តាហ៍នេះ ចំនួនអ្នកឆ្លងវីរុសប្រភេទថ្មី អូមីក្រុងបំបាំងកាយ នៅសហរដ្ឋអាមេរិក មានចំនួន ៩៦ករណី៕

​ប្រភព​៖ NBC Chicago