Blog detail

Nov 23, 2019

ហេតុ​ផល ៨ ដែល​ធ្វើ​ឲ្យអ្នក​ចេះ​តែ​ឈឺ​ក្បាល និង ទម្លាប់​មួយ​ចំនួនការពារ​មិន​ឲ្យ​ឈឺ​ក្បាល​ញឹក​ញាប់

ជំងឺ​ឈឺក្បាល​គឺជារឿង​ធម្មតាណាស់ ដែលវា​កើត​ទៅ​លើ​មនុស្ស​សឹង​តែ​គ្រប់​​គ្នា ហើយ​អ្នក​ខ្លះ​មាន​ការឈឺ​ក្បាល​​ញឹក​ញាប់​ទៀត​ផង។ ​ជំងឺ​ឈឺ​ក្បាល​ដែល​ពួក​យើង​តែង​ជួប​ប្រទះជាងគេនោះគឺ ការឈឺ​ចាប់​នៅ​ត្រង់​សៀតផ្កា​ទាំង​សង​ខាង តឹង​សរសៃរ​នៅលើ​មុខ ក ក្បាល និង ស្មារ  និង រោយ​គ្រាប់​ភ្នែក ជា​ដើម។ ការឈឺ​ចាប់​បែប​នេះ អាច​មាន​ឥទ្ធិពល​ទៅ​លើ​អ្នក​ពី ៣០ នាទី ទៅ ៣ឬ៤ ម៉ោង ហើយជួន​កាល វា​មិន​បាត់​ឈឺនោះ​ទេ លុះ​ត្រា​តែ​អ្នក​លេប​ថ្នាំ។ តើអ្នក​ដឹង​ថា កត្តាទម្លាប់​ប្រចាំថ្ងៃអ្វីខ្លះដែល​អាច​នាំ​ឲ្យ​អ្នក​កើត​ឈឺ​ក្បាល​ឡើង? 

១. អ្នក​នឹង​អាច​ឈឺ​ក្បាល​នៅពេល​អ្នកមានភាពតានតឹងផ្លូវ​អារម្មណ៍ ស្ត្រេស ព្រួយបារម្ភខ្លាំង ឬ ​ភ័យ​ខ្លាច​ជាដើម។ 

Photo by Volkan Olmez on Unsplash

ដូច្នេះ ដើម្បី​កុំ​ឲ្យបញ្ហាផ្នែក ​អារម្មណ៍ ធ្វើ​ឲ្យ​អ្នក​ឈឺ​ក្បាល អ្នក​គួរ​តែ​ចេះគ្រប់​គ្រង​អារម្មណ៍ និង ការស្រ្តេស គួរ​រំសាយ​អារម្មណ៍ ដើរ​ចេញក្រៅយក​ខ្បល់​អាកាស ស្តាប់​បទភ្លេង ឬ រំងាប់​អារម្មណ៍នៅកន្លែង​ស្ងាត់ៗ​ក៏បាន​ដែរ។ 

២. អ្នក​មិន​បាន​ញាំទឹក​ឲ្យ​បាន​គ្រប់​គ្រាន់​ ដែល​ធ្វើ​ឲ្យ​អ្នក​កង្វះជាតិទឹក​ក្នុង​ខ្លួន ព្រម​ទាំង​ខួរ​ក្បាល​ផង។ 

Photo by Kobu Agency on Unsplash

អ្នកគួរ​ញាំទឹក​ឲ្យ​បាន​គ្រប់​គ្រាន់ជា​រៀង​រាល់​ថ្ងៃ ទោះ​បីជា​មិន​ស្រេក​ក៏​ដោយ ដើម្បី​បំពេញ​ជាតិទឹក​ក្នុង​ខ្លួន​ ។​ អ្នក​គួរ​ញាំទឹក​ឲ្យ​បាន​យ៉ាង​ហោច​ណាស់ ២​ លីត្រក្នុង​មួយ​ថ្ងៃ។ 

៣. បរិយាកាសអ៊ូរអរ ឬ សម្លេង​ខ្លាំងៗដែល​អ្នក​ឮក៏ជា​មូល​ហេតុដែល​ធ្វើ​ឲ្យ​អ្នក​កើត​ឈឹ​ក្បាល​ដែរ។ 

Photo by mauro mora on Unsplash

ដូច្នេះ អ្នក​គួរ​តែ​ដឹង​ថា បើ​កន្លែង​ណា​មាន​មនុស្ស​អ៊ូអរ កុំ​ទៅ​ក្បែរឲ្យ​សោះ។ ឬ បើអ្នក​មិន​អាច​ធន់​សម្លេង​ខ្លាំងៗបាន អ្នក​អាច​ប្រើកាស​បិទត្រជៀក​ដើម្បីបន្ថយសម្លេងនោះ ឬ ជៀសវាង​កន្លែង​ឮៗដូចជា​concert ជាដើម។ 

៤. ការ​គេង​មិន​បាន​គ្រប់គ្រាន់ ឬ ​មិន​​ទៀងទាត់

Photo by Matthew T Rader on Unsplash

ដូច្នេះ អ្នក​គួរព្យាយាមបង្កើតទម្លាប់​គេង​ឲ្យបាន​ទៀងទាត់ ​និងឱ្យ​បាន​៧ ម៉ោង​ក្នុង​មួយ​ថ្ងៃ​។ លើសពីនេះ អ្នក​គួរកាត់​បន្ថយការ​ប្រើប្រាស់​គ្រឿង​អេឡិចត្រូនិច​ពេល​មុន​គេង​ដើម្បីឲ្យអ្នក​គេងលក់​បាន​ស្កប់​ស្កល់។ 

៥. ​ការខកខាន មិនទទួលទានអាហារបានទៀងទាត់

ដូច្នេះ អ្នក​មិន​គួរអត់​អាហារ​ណាមួយ​ ក្នុង​មួយ​ថ្ងៃ​បានទេ។ អ្នក​ត្រូវ​តែ​ច្បាស់​ថា​ខ្លួន​ញាំអាហារ​យ៉ាង​ហោច​ណាស់​ឲ្យ​បាន​៣​ពេល​ក្នុង​មួយ​ថ្ងៃដែរ។ 

៦. ការដែល​អ្នក​មាន​ឥរិយាបទ អង្គុយ ឬ ឈរ​មិន​ត្រង់​ខ្លួន ឧស្សាហ៍​ឱនជា​ដើម​ដែលអាច​ធ្វើ​ឲ្យអ្នកឈឺ​ចាប់​ត្រង់​ផ្នែក​ខ្នង​ខាង​លើ ស្មារ និង ករ 

អ្នក​គួរអនុវត្តការ​ឈរ ឬ អង្គុយ​ឲ្យ​បាន​ត្រង់​ខ្លួន ដើម្បីឲ្យ​ខ្នង​របស់​អ្នក​ត្រង់។ ម្យ៉ាងទៀត ព្យាយាម​កុំ​អង្គុយ​នៅ​កន្លែង​ដដែល​រយៈពេល​យូរ​ឲ្យ​សោះ គួរតែ​ក្រោកឈរ ឬ ដើរ​ខ្លះ​ដើម្បី​ឲ្យ​អារម្មណ៍​ប្រសើរ​បន្តិច។ 

៧.​ ក្លិនទឹកអប់ក៏ជាកត្តានាំឲ្យ​ឈឺក្បាល​ដែរ ព្រោះថា គ្រឿង​ក្រអូប​ខ្លះដូចជា សាប៊ូ ទឹកអប់ ក្លិនដែល​ដាក់​ឲ្យ​ក្រអូប​នៅក្នុង​បន្ទប់ ឬ​​ រថយន្ត មាន​ទៅ​ដោយ​សារជាតិគឺមី អាច​ឲ្យអ្នក​ឈឺក្បាល​ដែរ។ 

បើអ្នក​ចាញ់​ក្លិន ពិសេសក្លិន​ក្រអូប អ្នក​គួរ​ប្តូរ​មក​ប្រើ​ផលិតផល​ណា​ដែល​មាន​ក្លិន​ស្រាល ៗជាង​មុន។ បើ​សិន​ជា​ក្លិន​នោះជា​ក្លិន​របស់​អ្នក​នៅ​ក្បែរយើង អ្នក​គួរ​បើក​បង្អួច ឬ ដាក់​កង្ហារនៅក្បែរ​ខ្លួន​ដើម្បី​ឲ្យ​ក្លិន​នោះ​ចេញ​ឆ្ងាយ។ 

Photo by Patrick Fore on Unsplash

៨. កំហឹង​ក៏នាំឲ្យ​ឈឺ​ក្បាល​ដែរ ព្រោះថា​ពេល​ខឹង សាច់​ដុំ​នៅត្រង់កញ្ជឹង​ករបស់អ្នក​តានតឹង និង ឈឺក្បាល។

ដូច្នេះ នៅពេល​អ្នក​ចាប់​ផ្តើម​ខឹង អ្នក​គួរ​ដក​ដង្ហើម​ឲ្យ​បាន​វែងៗ និង យឺតៗ។ ព្យាយាម​ដក​ដង្ហើម​ចូល​តាម​ច្រមុះ និង ដង្ហើម​ចេញ​តាម​មាត់ ព្រោះ​ថា​ការធ្វើ​បែប​នេះជួយឲ្យ​សាច់​ដុំ​ត្រង់​ក្បាល​និង​ករបស់​អ្នក​ធូរ​ស្រាល។