Feb 17, 2020
ការផ្លាស់ប្តូរសំខាន់ៗ មួយចំនួនដែលកើតមានចំពោះស្ត្រីមានផ្ទៃពោះ
- ការផ្លាស់ប្តូរ អរម៉ូន អឺស្ត្រូសែន របស់រាងកាយ
អរម៉ូន អឺស្ត្រូសែន គឺជាអរម៉ូនភេទស្ត្រី ដែលកំឡុងពេលមានផ្ទៃពោះ រាងកាយផលិតអរម៉ូននេះច្រើនបំផុត។ ការកើនឡើងនៃអរម៉ូននេះ អាចធ្វើឲ្យស្ត្រីមានអារម្មណ៍ចាញ់ ចង់ក្អួតខ្លាំងនៅរយៈពេល ៣ខែដំបូង។ បន្ទាប់ពីនោះមក អរម៉ូននេះមាននាទីសំខាន់ក្នុងការជួយដល់ការលូតលាស់របស់គភ៌ក្នុងផ្ទៃ។
- ឡើងទំងន់
ពេលមានផ្ទៃពោះ ស្ត្រីអាចឡើងទម្ងន់ ស្របពេលដែលគភ៌ក៏ចាប់ផ្តើមលូតលាស់។ ទោះបីយ៉ាងណា ជួនកាលការឡើងទម្ងន់នេះ ក៏អាចឲ្យស្រ្តីហើម ដៃ ឬ ជើង ផងដែរ។ ហេតុនេះហើយ ស្ត្រីមានផ្ទៃពោះមិនអាចទ្រាំទ្រនឹងការងារធ្ងន់ ឬ កីឡារជាដើមបាន។
- បត់ជើងតូចញាប់
នៅពេលមានផ្ទៃពោះ អរម៉ូនរបស់អ្នករំញោចតំរងនោមឲ្យបញ្ចេញកាកសំណល់ ក៏ដូចជាផលិតទឹកនោមច្រើន។ មិនតែប៉ុណ្ណោះ នៅពេលគភ៌កាន់តែធំទៅ គភ៌ក៏ទៅ សង្កត់តម្រងនោម ធ្វើឲ្យស្រ្តីមានផ្ទៃពោះត្រូវបត់ជើងតូចញឹកញាប់។
- ភ្នែកអាចមើលមិនសូវឃើញ
Photo by Hoang Le Dieu Huyen on Unsplash
ស្ត្រីមួយចំនួន អាចមានអាការម្ញ៉ូប ឬ ពិបាកមើល ពេលមានផ្ទៃពោះ តែភាគច្រើនពួកគេនឹងប្រែមកធម្មតាវិញនៅពេលសម្រាលកូនហើយ។
- ការផ្លាស់ប្តូរចំណង់អាហារ និងរស់ជាតិ
ស្ត្រីមានផ្ទៃពោះភាគច្រើនមានការផ្លាស់ប្តូររស់ជាតិពេលបរិភោគអាហារ ដូចជាបរិភោគប្រៃខ្លាំង និង ផ្អែមជាងមុន។ អ្នកខ្លះ ក៏ បរិភោគអាហាររស់ជាតិជូរខ្លាំងដែរ។ មិនមែនតែរស់ជាតិទេ សូម្បីតែក្លិន ក៏ពួកគេងាយនឹងធុំនិងដឹងជាងអ្នកដទៃដែរ ។
- សុដន់រីកធំ
សុដន់របស់ស្ត្រីមានផ្ទៃពោះចាប់ផ្តើមផ្លាស់ប្តូរបន្តិចម្តងៗ នៅពេលដែលរាងកាយរបស់ពួកគេចាប់ផ្តើមត្រៀមផលិតទឹកដោះ។ សុដន់ស្ត្រីមានផ្ទៃពោះនឹងរីកធំ តឹងណែន។
- ការផ្លាស់ប្តូរ ការលូតលាស់សក់ និង ក្រចក
Photo by Kristoffer Jensen on Unsplash
ការផ្លាស់ប្តូរអរម៉ូន អាចធ្វើឲ្យស្ត្រីខ្លះជ្រុះសក់ខុសធម្មតា។ ប៉ុន្តែ ស្ត្រីមួយចំនួនបែរជាដុះសក់កាន់តែច្រើន និង ក្រាស់ ជាងមុន។ មិនតែប៉ុណ្ណោះ ពួកគេក៏អាចដុះរោមច្រើនខុសធម្មតានៅលើ ដៃ ជើង មុខ និង ខ្នង ផងដែរ។
- វិលមុខ ហើយជួនកាលសន្លប់
នៅពេលគេងផ្ងាលើគ្រែយូរ សរសៃរឈាមធំដែលដឹកនាំឈាមពីរាងកាយផ្នែកខាងក្រោម ទៅកាន់បេះដូងត្រូវបានរារាំង ហើយនេះ អាចនាំឲ្យ លំហូរឈាមទៅមកបេះដូង ធ្លាក់ចុះ ជាហេតុនាំឲ្យអត្រាសម្ពាធឈាម ចុះខ្សោយ។ នេះហើយដែលធ្វើឲ្យស្ត្រីមានផ្ទៃពោះ អាចនឹងវិលមុខ ឬអាចសន្លប់ម្តងម្កាលផងដែរ។
- ការផ្លាស់ប្តូរសីតុណ្ហភាពរាងកាយ
Photo by Matteo Fusco on Unsplash
សីតុណ្ហភាពរាងកាយរបស់ស្ត្រីមានផ្ទៃពោះ តែងតែកើនឡើងបន្តិច តាំងតែពីចាប់ផ្តើមមានគ៌ភ រហូតដល់ពេលសម្រាល។ ហេតុនេះ ទើបពួកគេតែងត្រូវការបរិភោគទឹកច្រើនជាងមុនដែរ៕